 ملف شامل لعمل الكيك الناجح ببساطة |
 |
| كاتب الموضوع | faten |  |  |  | انشر الموضوع | شاطر |
| |||||||||||||||
| ملف شامل لعمل الكيك الناجح ببساطة بنات نقلت لكم اليوم موضوع مهم جدا .. انا استفاديت منه كثير في عمل الكيك اتمنى ان تستفادوا منه مثلي ... ...... المعلومات والملحوظات ....... 1- بدايةً الكيكه الاسفنجيه لا يدخل فى مقاديرها لا زيت ولا زبد ولا لبن ولا عصير انا استغربت لما لقيت البعض بيضيف لبن او عصير الكيكه الاسفنجيه مختلفه عن الكيك العادى 2- جميع المقادير المستخدمه بيض او طحين لازم لازم تكون بدرجه حراره الغرفه يعنى انا دائما بحفظ الدقيق فى التلاجه ولكن قبل ما اعمل الكيكه الاسفنجيه بنص ساعه بخرج البيض والدقيق واوعى تنسى المعلومه دى لانها مهمه جدا حتلاقى قطرات ماء تجمعت على البيض بعد النص ساعه كده تقدرى تستخدمى البيض 3- لو عاوزه الكيك بنكهه البرتقال ضيفى برش برتقاله على البيض بدل الفانيليا وليس عصير البرتقال ولو عاوزه بطعم الفراوله ضيفى روح الفراوله ولكن روح الفواكهه تضاف بعد اضافه الطحين لكن برش البرتقال بيكون مع البيض كبديل للفانيليا 4- الدقيق والنشا والبيكنج باودر اللى حكتبلكم مقاديرهم تحطوهم مع بعض وضرورى جدا جدا تنخلوا الخليط مرتين يعنى حطى البيكنج باودر والنشا على الدقيق وانخليهم سوا ومهم اوى مرتين 5- مهم اوى ان المقادير تكفى صينيه لان لو الخليط اكبر من نص الصينيه يبقى الكيكه حترتفع وتهبط من النص وحتبقى معجنه 6- مهم اوى الفرن يتسخن اثناء تحضيرك للكيك ودرجه الحراره لازم تكون متوسطه لانها لو عاليه او منخفضه حتبقى مشكله والكيكه تبوظ اهم حاجه اضبطى الفرن على درجه 180 واغلقى الفرن لحد ما تنتهى من عمل الخليط ... اخواتى معلش انا طولت عليكم بس لازم لازم احكى معاكم بالظبط كل فتفوته لعمل الكيك واخيرا اللى بيخلى الكيكه مكتومه حاجتين مالهومش تالت الاولى انك مضربتيش البيض المده المحدده ليه وهى ربع ساعه يكون المضرب شغال بدون انقطاع على اعلى سرعه والثانيه انك مضفتيش الدقيق معلقه معلقه ممكن تكونى ضفتيه مره واحده او كميه كبيره كل مره وده بيخلى الكيكه طالعه زى الخبز مكتومه . .......... الان المقادير المظبوطه .......... طبعا احنا خرجنا البيض والطحين قبل العمل بنص ساعه واول ما نبدا نشتغل نسخن الفرن ونجيب الصينيه ندهنها سمنه وبعدين نحط فيها دقيق اكيد انتوا فاهمين العمليه دى المقادير دى انا معرفش حتناسبك ولا لا بس عموما وانتى بتصبى الخليط فى الصينيه بتاعتك وطبعا انا معرفش مقاسها يبقى عموما اى خليط لازم يوصل لمنتصف الصينيه لو لقيتى لسه عندك خليط ممكن تحطيه فى صينيه تانيه اهم حاجه للكيك سواء عادى او اسفنجى ان الخليط ميزدش عن نصف الصينيه لانه حيرتفع .... ...... المقادير ......... الكوب المستخدم للدقيق لازم يكون هو هو اللى حتقيسى بيه السكر والنشا 6 بيضات بدرجه حراره الغرفه كوب الاربع دقيق كوب الا ربع سكر ناعم مهم يكون حبيباته ناعمه ربع كوب نشا ملعقه كبيره بس ممسوحه بيكنج باودر ملعقه كبيره ممسوحه فانيليا ربع كوب كاكاو غير محلى لو عوزاها بيضاء مش بالكاكاو يبقى بدل كوب الا ربع دقيق يبقى كوب واحد فقط وبرده نفس المقادير ....... العمـــــل ......... سخنى الفرن وبعدين حطى البيض وعليه الفانيليا او بشر البرتقال وعلى اعلى سرعه اضربى البيض والفانيليا لمده دقيقتين وبعدين متفصليش الكهربا عن المضرب وهو شغال بعد الدقيقتين ضيفى السكر مره واحده واحسبى حوالى ربع ساعه على اعلى سرعه فى البدايه حتلاقى المزيج عباره عن رغاوى لكن بعد كده حتلاقى المزيج بقى كريمه وحجمها بقى تلت اضعاف حجم البيض فى الاول لازم يبقى الحجم تضاعف لاننا عاوزين الهوا اللى جعل البيض ينتفخ اول ما تلاقى الخليط تضاعف بعد الربع ساعه شيلى المضرب خالص ومتستخدميهوش تانى فى ناس بتحط الدقيق وتشغل على اقل سرعه وده خطأ كبير جدا جدا الطريقه دى حتخلى الهوا اللى نفخ البيض يخرج تانى ومش حتبقى هشه ابدا باستخدام معلقه خشبيه ضيفى ملعقه دقيق واحده وقلبى ببطء جدا جدا جدا جدا جدا فى اتجاه واحد اوعى تغيرى الاتجاه او تقلبيها من تحت لفوق وافضلى ضيفى ملعقه دقيق وقلبى مرتين وضيفى الملعقه الاخرى وبرده قلبى تقلبتين بشويش وببطء شديد لازم يفضل الخليط مرتفع لحد ما تخلص ممكن هنا تضيفى روح الفاكهه لو عوزاها بالفراوله او الاناناس بعد ما تخلصى صبى الخليط بشويش وايضا بمنتهى البطء فى الصينيه ودخليها الفرن . واياك اياك اياك اياك تفتحى عليها قبل 40 دقيقه بعد اربعين دقيقه اختبريها بعود خشبى لو نضجت طفى النار و اوعى تخرجيها من الفرن خليها جواه لانها لو خرجت وهى سخنه حتتعرض لهواء بارد حتبوظ سبيها فى الفرن بعد ما تقفلي الحراره نص ساعه تقريبا وبعدين خرجيها ان شاء الله لو اتبعتى كل معلومه وطريقه انا كتباها حتلاقى احلى كيكه اسفنجيه عملتيها وكل ما تنجح معاكى افتكرينى وتانى يوم اعمليها بالكريمه وزينيها ولو مستعجله وعوزاها فى نفس اليوم حطيها فى التلاجه 3 ساعات مثلا بس اوعى تحطيها فى التلاجه بعد ما تطلع من الفرن مباشره يارب اكون افادتكم . ملحوظه بخصوص الدريم ويب (الكريم شانتيه ) التورته تحتاج ربع كيلو للتغليف والتزيين او بما يعادل 6 اظرف هناك نوعان نوع بودره يأتى على هيئه علبه كل علبه فيها ظرف او ظرفان والنوع التانى على شكل كريمه الطبخ بالنسبه للباودر لمن تستخدم باودر بالكيلو مثلا يبقى كل كوب كريمه باودر معها فنجان الا ربع لبن مثلج ونخفق ولو عاوزاها بالشيكولاته ضيفى كاكاو وزودى اللبن بسيط اما فى حاله الأظرف الجاهزه نصيحه منى لا تتبعى التعليمات المكتوبه على ظهر الظرف لان الكريمه حتبقى سائله نصيحتى لك هى لكل ظرفان باودر ضعى فنجان الا ربع فقط لبن مثلج وملعقه كبيره ممتلئه من النشا (الكورن فلاور )وحتحصلى على احلى كريمه متماسكه وضعيها فى التلاجه فتره حوالى نص ساعه قبل البدء بالتغليف والتزيين اما كريمه الطبخ المخصصه ايضا للحلويات اتبعى نفس ماهو مكتوب عالعلبه بالظبط لا تقلقى الان ما قراتموه هو اساسيات عمل الكيكه الاسفنجيه ولكن ولكن ولكن انا شخصيا احب اضافه الزيت او الزبده لعمل اى كيكه ودى راجعه للذوق الشخصى وغالبا تورتاتى تتنوع مابين كيك اسفنجى وكيك عادى ونا شايفه ان الكيك العادى مناسب كمرحله اولى تقدرى تتعلمى الاول ازاى تعملى تورته وبعدها تنتقلى للكيكه الاسفنجيه ومقادير الكيك العادى لمن تريد هى كوب ونصف دقيق منخول مضاف له ملعقه ونصف صغيره بيكنج باودر _ كوب الا ربع سكر عادى _ نصف كوب زيت او زبد _نصف كوب زبادى _3 بيضات حجم كبير او اربعه صغير_فانيليا لو اردتى عملها بالشيكولاته انقصى ثلث كوب دقيق وضعى بدلا منه كاكاو باودر غير محلى والان مع طريقه عمل الكيكه الاسفنجيه بالصور كتطبيق لما ذكرته سابقا هنا الطحين والكاكاو والنشا والبيكنج باودر .  نقوم بنخلها كما ذكرنا سابقا  ونتركهم جانبا نقوم بضرب البيض والفانيلا حوالى دقيقتان وبعدها قومى بأضافه السكر  نقوم بالخفق لمده ربع ساعه على اعلى سرعه الى ان يتحول الخليط للشكل الكريمى ويكون أضعاف حجم البيض  بعد ذلك نقوم باضافه الطحين المنخول ومعه البيكنج باودر والكاكاو ملعقه ملعقه ونقلب كما ذكرت فوق  والان الخليط اصبح جاهز ونصبه فى الصينيه  ونتبع طريقه الخبز والتى شرحتها سابقا وهاهى شكل الكيكه بسم الله ماشاء الله دى بالشيكولاته  وواحده أخرى بيضاء بالفانيليا  هذا هو اساس عملها ننتقل الان الى المراحل الأخرى الا وهى الحشو والتزيين الان سيكون معنا كيكه فكيف نقطعها؟؟؟؟؟؟؟؟ ............... قطـــــع الكيكة ........... انا افضل تقطيعها بالخيط بدلا من السكين طبعا بعد مابردت تماما ونقطعها هكذا نلف الخيط حول الكيكه ونوسطه جيدا ويكون هكذا  ثم نقوم بوضع الخيط على شكل حرف xهكذا  ونمسك الطرف الايمن بيدنا اليسرى وطرف الخيط الايسر بيدنا اليمنى يعنى العكس ونشد الخيط ونفضل ماسكينه بقبضه ايدنا ونشد  سنجدها بتقطع ومظبوطه ان شاء الله مائه بالمائه وهنا الحشو انا استخدمت كما فى الصوره دريم ويب باودر وفواكهه وشيكولاته مبشوره  وطبعا الصور شارحه نفسها وضعت ملعقتين من سائل الفواكه على الكيكه المقسومه نصفان لتطريتها واضفت جزء من الكريمه وفوقها الفواكهه  اضفت النصف الاخر وغلفت التورته بالكريمه وبدأت ازينها   اتمنى من الله ان يكون الشرح السابق كاف ووافى وهذه تورتة أخرى أكيد بنفس المقادير بس الحشوة مختلفة    ونا بفضل بعد تغليف التورته اضعها فى التلاجه عشر دقائق تتماسك وارجع ازين تانى وهنا وضعت فى جوانب التورته شيكولاته فارمسيل حبيبات وممكن تستبدليها بجوز هند او اى مكسرات مفرومه  نبدأ بوضع الكريمه فى كيس التزيين ونزين هكذا  ونضيف الفواكهه  طبعا كملت الاماكن الفارغه بالكريمه واضفت قطع من الكريز الاحمر وده شكلها ماشاء الله عاليه ومرتفعه   الحشو كريمه الجبنه مقادير الحشو كوب كريمه باودر كوب الا ربع لبن مثلج ملعقه سكر بودره كبيره حوالى اربع ملاعق جبنه فلادلفيا وممكن استبدالها باربع قطع كيرى نضرب مقادير الحشو بالمضرب الكهربائى الى ان تتجانس ويمكن اضافه ملعقه لبن لو حبيتى تكون سائله الى حد ما ويمكنك اضافه ملعقتان كاكاو باودر لو عاوزه الحشو بالشيكولاته هنا سويت الكيكه لأنها مربعه من عند الاطراف  وقسمتها نصفان وشربت القسم السفلى بعصير او ممكن مربى مخففه بماء  وزعت الكريمه   غلفت الجوانب بجوز هند مبشور ومكسرات هناك ملحوظه مهمه ممكن سطح الكيكه معاكى ميكونش مغلف بالكريمه بشكل منسق ومتقن فلا تقلقى الفواكه اللى حتحطيها فوق لن تظهره ومع الوقت ستحترفى التنسيق ان شاء الله  وبدأت فى التزيين    كريمه الشيكولاته البيضاء مقادير الحشوه عشر قطع جبنه كيرى وومكن استبدالها بعلبه فلادلفيا ربع كوب لبن كوب الا ربع شيكولاته بيضاء مبشوره الطريقه يسخن اللبن ويضاف اليه الشيكولاته المبشوره ونتركها تسيح وتبرد تماما تماما وبواسطه المضرب الكهربائى نضرب كل المكونات السابقه جميعا ونضعها فى التلاجه ربع ساعه قبل التغليف والتزيين طبعا عملت الكيكه وقسمتها وحشيتها مثل الطرق السابقه وغلفتها كمان وده التزيين   ووضعت فى الجوانب شيكولاته فارمسيل وكريمه هكذا  والان نأتى لتورته اغلبنا بيحبها والتورته دى انا بعتبرها أهم تورته فى ملفى ليه بقى لأنها اسهل تورته ممكن تتعمل انا انصح كل مبتدئه فى عمل التورتات انها تعملها وحتشوفوا بنفسكم ازاى سهله وازاى روعه (( تورته بحشوه الأيس كريم)) زى ماقلت التورته دى تنفع المبتدئات وكمان تنفع لو عندك كيك بايت او عملتى كيكه وباظت منك فى الفرن مرتفعتش او هبطت او او اى سبب لفشلها انا كان عندى كيكه باظت منى فى الفرن وده طبعا شئ وارد انه يحصل وده شكل الكيكه  واضح جدا انها مش مظبوطه فطبعا مرمتهاش عملت بيها ايه؟؟؟؟؟؟؟؟؟؟؟؟؟؟؟؟ اولا جبت نفس الصينيه اللى غملت فيها الكيكه وبطنتها بالبلاستيك الشفاف ووضعت فيها حلقات اناناس  وجهزت ايس كريم ثلاث اكواب كبيره انا استخدمته بالفانيليا وتركته يسيح الا حد ما يعنى خرجته من التلاجه نصف ساعه تقريبا قبل العمل علشان يبقى سهل معايا ووضعت جزء منه على الاناناس هكذا  وبعدها وضعت فواكهه  طبعا نوع الايس كريم او الحشوه متروك ليكى اختى الكريمه ثم وضعت جزء من الكيكه قطعتها بنفس الطريقه اللى ذكرتها قبل كده وشوفو كانت مفتته بس عادى لانها ستجمد مع الايس كريم  وبعدين وضعت ايس كريم مره اخرى وفواكه وهكذا  وطبقه اخرى كيك وهكذا ثم نغلق البلاستيك الشفاف عليها ونتركها بهذا الشكل فى التلاجه اربع ساعات مثلا  وبعد ذلك نضع طبق التقديم فوقها ونقلبها وبعدين نشيل الصينيه وننزع البلاستيك عنها معلش صوره الخطوه دى اتمسحت منى عموما ده شكلها  لو تلاحظوا انا عملت ايه وضعت عالجوانب فارمسيل لزقت الى حد ما ووضعت داخل كل قطعه اناناس قطعه كريز وممكن تضعى فراوله وزينت بالفارمسيل ايضا وده شكلها من فوق  قد ايه سهله وبسيطه وومكن تعمليها باى شكل انتى عوزاه وممكن تستبدلى الايس كريم بالكريم شانتيه او اى نوع كريمه هنا انا غيرت شويه فى شكلها وضعت فى النص فراوله واتبعت نفس الخطوات السابقه بالظبط  وده شكلها بعد ماقلبتها  نأتى الان لتورته اخرى بحشوه مختلفه وهى (( تورته بحشوه كريمه الزبده بالشيكولاته )) كريمه الزبده كريمه لذيذه وبتدخل فى كتير من التورتات كحشو وتزيين طبعا هى دسمه الى حد ما بس انا بحبها جدا جدا طبعا نجهز كيكه شيكولاته زى ما عملناها فى اول الملف انا حبيت اعمل تزيين مختلف للتورته من اختراعى وطلع رائع عملت ايه جبت شيكولاته خام مبشوره حوالى كوب ونص ووضعتها فى قدر استانلس وبعدين وضعتها فى طاسه بيها ميه وسيحتها على حمام مائى هكذا  وبعدين جبت ورق الزبده ووضعت عليه الشيكولاته  ووزعتها بملعقه فرشتها عالورقه هكذا  وتركتها حوالى خمس دقائق فى الرف تحت الفريزر تتماسك فقط ولكن لا تجمد حتى يسهل تقطيعها هكذا انا استخدمت شكل النجمه طبعا ننزعها بخفه وبشويش حتى لا تتكسر لانها حتكون لا زالت لينه  وبعدين نتركها تكمل تجميد فى التلاجه  ونأتى لعمل الحشوه مقاديرها ثلثين كوب سكر بودره منخول تلت مرات كوب زبده لينه وليست سايحه ربع كوب لبن لتليينها فانيليا 2 ملعقه كاكاو باودر كبيره وممكن تبقى بدون كاكاو على حسب الذوق نخفق الزبده الى ان تتحول للشكل الكريمه  نضيف السكر البودره على مرتين ونخفق ثم نضيف الفانيليا والكاكاو واللبن ونخفق جيدا الى ان يتحول الخليط للشكل الكريمى المتماسك  نتركها فى التلاجه ربع ساعه تتماسك وبعدين نقسم الكيكه ونضع جزء من الكريمه ونا اضفت حبوب الشيكولاته فيها هكذا  نغلق الكيكه والجزء المتبقى من كريمه الزبده نضيف عليه كوب كريمه مخفوقه مسبقا ونقلبهم معا ونغلف الكيكه ونبدا بتزين الجوانب هكذا    نسيت اقولكم ان بعد ما الشيكولاته النجوم بردت عملت نقط عليها من الشيكولاته البيضاء وتركتها تجمد ايضا وبدأت فى وضعها فوق التورته هكذا   بس بعد كده حسيت انى لو وضعت عليها شيكولاته حبيبات حتبقى افضل فرجعتها المطبخ تانى ووزعت عليها الشيكولاته هكذا ايه رأيكن مش كده احلى  تورته الفراوله بالكريم باتسيير والجناش بدايه الجناش هو نوع من الكريمه عباره عن شيكولاته وكريمه خفق وزبده و تحضر وتستخدم بطريقه الصب على التورته او نتركها فتره تجمد فى التلاجه ونضعها فى كيس التزيين ونزين بها مقادير الجناش انا استخدمت شيكولاته بيضاء ولونتها المقادير كوب ونص شيكولاته مبشوره بيضاء كوب كريمه لبانى(كريمه الخفق للحلويات) ملعقه زبده ملون طعام احمر او اى لون تفضليه الطريقه نغلى كوب الكريمه ونرفعه من عالنار ونضيف عليه الشيكولاته المبشوره ونتركها تسيح وبعدها نضيف الزبده ونترك الخليط يبرد تماما ولكن لا يتجمد يكون على شكل سائل وبعدها نضيف ملون الطعام نقطه نقطه الى ان نصل للون المطلوب ونتركها جانبا طريقه كريمه الباتسيير مقاديرها ثابته انما طريقتها تختلف كلا حسب طريقته وهذه هى اسهل طريقه له والمقادير هى كوب وربع لبن بيضه كامله صفار بيضتان ربع كوب سكر بودره ملعقه كبيره دقيق ملعقه كبيره نشا فانيليا انا وضعت كل المقادير معا فى الخلاط وبعدها وضعتها عالنار مع التقليب المستمر المستمر المستمر مثل المهلبيه الى ان يتكاثف الخليط بعد عشر دقائق تقريبا وننزله من عالنار ونتركه يبرد ونضيف عليه ملعقتان من روح الفراوله وهذا شكله  نتركه جانبا هو والجناش ونأتى للتزيين انا استخدمت شيكولاته بيضا وسيحتها فى حمام مائى وقسمتها نصفين نصف تركته ابيض وفردته وعملت نفس الطريقه فى التورته السابقه وقطعته بقطاعه هكذا  والنصف الاخر لونته بلون احمر بنفس درجه الجناش ايضا  وفردته ايضا وقطعته بنفس الشكل السابق الجزء الاحمر نقط عليه شيكولاته بيضا والابيض نقط عليه شيكولاته حمرا اسفه الصوره اتمسحت نأتى للكيكه قسمتها نصفين ووضعت الكريم باتسيير  وقطع من الفراوله هكذا  وقفلت الكيكه وغلفتها وراعيت ان يكون سطحها املس ومتساو ووضعتها على شبك سلك لانى حصب عليها الجناش ونضع تحتها صينيه او طبق بلاستيكى  واحضرت ورق بلاستيك ووضعته على منتصف الكيكه هكذا حتى يكون الجناش على نصف منها فقط هكذا  ونبدأ بصب الجناش  ونتركه على السلك يصفى وندخله التلاجه يتماسك وهنا بعد ان تماسك  ونبدا بالتزيين بالوردات اللى عملناها هكذا  وهذا شكلها النهائى بعد التزيين  تورته بالفواكهه وكريمه البارفان كريمه البارفان كريمه رائعه جدا ونا بحب استخدمها كحشوه وهى سهله جدا جدا جدا وشبيهه بالموس الفرق بينهم انها بتكون بالجيلاتين انما الموس حتشوفوه فى التورته القادمه مقادير كريمه البارفان كوب ونصف كريم باتسيير محضر (طبعا عرفنا طريقته سابقا) ظرفان دريم ويب او ثلث كوب ملعقتان جيلاتين بدون نكهه مذوبان فى ربع كوب ماء ساخن ونتركه يدفأ ثلاث ملاعق لبن مثلج فانيليا ملعقه روح اللوز ويمكن استبداله بروح الفواكهه اى طعم تفضليه الطريقه نخفق الدريم ويب مع اللبن خفق بسيط ونضيف كوب الكريم باتيسير المعد سابقا ونخفق الى ان يتماسك الخليط ويصبح بقوام الكريمه نضيف الفانيليا وروح اللوز والجيلاتين ونخفق مره اخرى ونتركه فى الثلاجه ربع ساعه قبل الاستخدام انا استخدمت كيكه مربعه قسمتها نصفان ووضعت كريمه البارفان ومعها فواكهه  ووضعت النصف الاخر من الكيكه واغلقتها وغلفتها بالكريمه  ونبدأ فى التزيين هكذا   وده شكلها النهائى اتمنى يعجبكن التزيين والحشو  وها انا الان اقدم لكن اخواتى طريقه عمل قطع الجاتوه انا عملت كيكتان مربعتان وقطعت كل واحده نصفين فأصبح عندى اربعه اقسام  نأخذ اول جزء ونضع عليه الكريمه انا استخدمت دريم ويب  ووزعت الكريمه هكذا  ووضعت تانى شريحه من الكيك وفوقها كريمه هكذا الى ان انتهيت من وضع الاربع طبقات  وبعدها سويت السطح جيدا جدا جدا  وبعده قمت بتقطيع الاطراف من كل اتجاه بحوالى اتنين سم حتى تكون الاطراف متساويه هكذا  ثم نقوم بتقطيع الكيك بسكين ويكون بجانبنا طبق به ماء ساخن نقطع ونضع السكين فيه ونكمل تقطيع مره اخر وذلك حتى لا تلتصق الكريمه فى السكين  نقوم بتزيين كل قطعه على حسب الذوق الشخصى انا وضعت شيكولاته مبشوره وقطع اناناس وده اختيارى طبعا   والجزء اللى قطعته علشان اساوى حروف الكيكه لم ارميه بل فتته ووضعته فى كؤوس ووضعت عليه كريمه وشيكولاته مبشوره هكذا  الموضوع الأصلي : ملف شامل لعمل الكيك الناجح ببساطة // المصدر : منتديات ولا بالاحلام // الكاتب: faten | |||||||||||||||
 |
موضوع: ملف شامل لعمل الكيك الناجح ببساطة 
| اعلانات | |
| الإشارات المرجعية |
| مواضيع ذات صلة | |
|
