بريوش النوتيلا
اذا كنت جديدة على الطبخ فاكتر شي ممكن تخافي منه هو اما المعجنات أو الحلويات , و انا كنت خاف من المعجنات , و لما شوف ماما أو أية عم يشتغلوا فيهم و هنن نايميين , قول لحالي بحياتي ما رح صير متلهم , و لاحكي الحق انا كنت عم احكي حكي نظري , يعني مو انو جربت و فشلت , لا هيك عندي حاجز بيني و بين المعجنات و بس . و كل ما يكون عندي جمعة و بدها معجنات أتصل بـ 911 و قلها , بتذكري لما كنت بنتك ( أو أختك حسب الشخص ) , فورا تقلي خير ان شاء الله كم كيلو عجين بدك .. هيك علموني على الكسل و بمساعدتهم الي كبر الحاجز بيني و بين المعجنات .
بعدها كنت سهرانة مرة برمضان لحالي انا و الكتاكيت و اشتهيت فوت على المطبخ حضرلي شي شغلة , و كنت بيومتها شايفة وصفة للتوست في موقع لك , الوصفة كانت بسيطة كتير فاتشجعت و حضرتها … و لما جهزت و طلعت ريحة الخبز في البيت و اتجمعي القطط حوالي و هن انو شو هل الماما الخطيرة , حتى التوست بتعمله بالبيت ..
هل ردود الافعال شجعتني كتير كتير و الكل على اد ما انبسطوا اتحمست و صرت جرب بهل المعجنات و هيك بديت .
كانت بداياتي ان ااقسم المقدار لحتى اوصل لاصغر شي بقدر عليه , يعني مثلا ثلاث ارباع كاسة طحين و ما كنت افهم ليش ماما تقلب على ظهرها من الضحك كل ما تسمعني عم لت و اعجن بشوية طحين , تقلي لك بنتي هدول برشهن انا رش على العجينة , و الله بيلزقوا بايديك مو مستاهليين . بس انا كنت خاف كبرها , و الحمد لله صرت جرب شي جديد من فترة لفترة و صار يطلع معي شي , بس مو لدرجة اني أثق بنفسي بالمعجنات مثلاً و حضرهن لجمعة كبيرة
بعد بفترة , صار عندي صبحية نسوانية صغيرة و كان من بين الضيوف ستات رح يزوروني لاول مرة و كمان كان من بينهم ست مشهورة بعيلتنا بالطبخ و الحلويات و كمان مشهورة باللئامة , يعني ما بتعطيك طريقتها و مقدارها لو بتطلع عينك و اذا صدف و عطتهم فبتكون غلط ! يا ربي اعمل و الا ما اعمل , يلا يا موني حضري عجينتك و شوفي شو رح يطلع معك , و كنت بوقتها متوصلة لعجينة القطنة من جديد , حضرت كم نوع . الحمد لله على اد ما انبسطوا الضيوف و حبوا الفطاير عرفت ان المعجنات الي بتعملها الست على ايدها سحر خاص و شي بيضيف كتير الها و على فكرة الست اياها سالتني عن طريقتي , بس طبعا مو بطريقة مباشرة و انا لحتى احكي الحق طلع شرشبيل براسي و قالي اعملي متلها و طنشي , بس بعدها قلت بقلبي و لا و الله , اصلا مو بشطارتي اتعلمت , رب العالمين هو الي يسر , الحمد لله الذي علمنيه من غير حول مني و لا قوة . و عطيتها طريقتي على التكة و هل الحكي قبل الموقع بشي 5 سنين .
, هلا الحمد لله صار عندي اريحية بالتعامل مع العجين , و ممكن حتى حضر عجينة و تطلع روعة من دون مقادير , يعني على النظر متل ماما حبيبة قلبي , و هيك ما حدى بيعلم أكتر من التجربة لهيك بتمنى انه نحكي و نجرب و نشجع بعض لحتى كل واحدة هون تصير شطارتها متل ما بتحب و تتمنى .
الوصفة اليوم وصفة جديدة للبريوش , و الطريقة بسيطة و نكهة الزبدة بتجنن فيها , أنا حشيتها بالنوتيلا و ما رح خبركن ردود افعال الاولاد عليها , صحة و الف هنا على البهم . انت فيكي تحشيها بالي بتحبيه و لو علي ما بحشيها غير جبنة بيضاء مع كاسة شاي بتطلع يمممي .
بالصحة و الهنا
2 كوب طحين
1 بيضة كبيرة , مخفوقة قليلاً بالشوكة
نصف كوب ( 125 غ ) زبدة طرية
ربع ملعقة صغيرة ملح
نصف ملعقة صغيرة بيكنغ بودر
2 – 3 ملعقة كبيرة سكر
فانيليا
التخميرة الأولية :
ملعقة صغيرة خميرة
ربع كوب حليب دافئ
ملعقة صغيرة سكر
الحشوة :
شوكولا نوتيلا
للوجه :
صفار بيضة مخفوقة مع بضعة حبات نسكافييه
للتلميع :
قطر
• تذوب الخميرة مع الحليب و السكر , تغطى و تترك حتى يتضاعف حجمها و تظهر عليها فقاعات و رغوة .
• يدعك الطحين و الملح و البيكنغ بودر و السكر و البيضة و الفانيليا مع الزبدة و مزيج الخميرة . يضاف المزيد من الحليب ( غير مذكور بالوصفة ) بالتدريج حسب حاجة العجينة و يعجن لمدة 10 – 15 دقيقة حتى الحصول على عجينة ناعمة جدا و ملساء .
• تغطى العجينة بشكل محكم و توضع في مكان دافئ و تترك حتى يتضاعف حجمها .
• تغلف صينية دائرية صغيرة بقياس 22 سنتيمتر بورق الزبدة , تقطع العجينة الى كرات صغيرة , تبسط الكرة قليلاً على راحة الكف و تحشى بالشوكولا ثم تغلق و تصف في الصينية . تغطى الصينية بورق نايلون لاصق بشكل محكم و تترك حتى تنتفخ من جديد و يتضاعف حجمها و تسد كل الفراغات بين الكرات .
• يحمى الفرن على درجة حرارة 180 درجة مئوية , يدهن الوجه بصفار البيض ثم تخبز في الفرن المحمى لمدة 30 دقيقة أو حتى تنضج و تشقر .
• تخرج صينية البريوش و يدهن بالقطر و هو لا يزال ساخناً ثم تترك حتى تبرد . تقدم مع العصير أو الشاي أو القهوة .