سينابون الشيف لطيفة

مقادير عجينة السنابون:

4 أكواب ونص طحين فاخر منخول 

2 بيض 

1/2 كوب زيت 

1 ملعقة شاي باكنج باودر 

وما ننسى رشة الملح






2 ملعقة طعام سكر 

2 معلقة طعام خميرة فورية 

2 معلقة طعام حليب بودرة 

كوب و3/4 الكوب ماي دافي ( لو بتستخدمي الطحين الكويتي مقدار الماي هذا بيكون مظبوط%100)





مقادير حشوة السنابون:

1/4 كوب زبدة لينة 

1/4 كوب سكر أبيض أو بني 

2 معلقة طعام جرفة بودر 

1 ملعقة طعام كاكاو بودر





مقادير صوص الجبن للتغطية :-

6حبات جبن كيري أو ربع كوب جبن كريمي مثل الفلادلفيا

1/2 كوب حليب مكثف محلى





طريقة تحضير العجينة :

في خلاط العصير بنحط (الماء والزيت والبيض والسكر والحليب البودر والخميرة) ونخفقهم لحد ما لون الخليط يصير فاتح والخميرة تذوب بشكل جيد جداً في الخليط السائل. ونكون حاطين الطحين والباكنج بودر ورشة الملح في اناء واسع ونصب الخليط ونبدأ نعجن بشكل جيد




لحد ما نحصل على عجينة ملساء ومتماسكة وهذا شكلها النهائي 




خليتها شوية حوالي ربع ساعة لحد ما جهزت الحشوة وبما اني الماي المستخدم دافي ماشاء الله على طول خمرت .




خليط الحشو سهل مجرد خفق (الزبدة والسكر والجرفة والكاكاو البودر) بالخفاقة لحد ما ما يتكون صوص كثيف والسكر يبدأ يذوب ولونه بعد ما يكون غامق بسبب بودرة الكاكاو يصير فاتح من الخفق.




جذي العجينة جاهزة والحشو جاهز. أنا افضل الحشو يكون مخفوق مع بعض بهذا الصورة وهو أفضل من الطريقة التقليدية الي هي دهن العجينة بالزبدة وبعدين نرش السكر والجرفة وهذا لسببين نكهة السنابون تكون قوية وواضحة جداً عن تجربة وفي الفرن ما تذوب الحشوة ولا تسيح وتظل ثابته وهذا الي بنشوفة في المرحلة الياية.




نبدأ نفرد العجينة بالنشابة


 



ونحاول نخليها سميكة شوية علشان وقت فرد الحشو واللف بعد بتصير رهيفة نراعي هذي النقطة.

نوزع الحشو على السطح ونخلي حوالي 3 سم في النهاية عسب تتماسك العجينة وما تفتح وقت الخبز





ونلفها رول


 

 





ونبدأ نقطعها بسمك اصبعين وهذا هو المقاس الصحيح للسنابون 


 




نصفهم في صواني مبطنة بورق الزبدة ونخليهم يخمرون






لحد ما يخمر السنابون جهزت الحشو خفقت الجبن ويا الحليب المكثف المحلى 









نقطة مهم.

بالنسبة لي أفضل يكون السنابون دافي وصوص الجبن كثيف مثل جي عسب حرارة السنابون تذوب الصوص ويغطيها بس بدون ما ينزل وايد على الجوانب . والعكس صحيح لو كان السنابون عندج بارد يفضل الصوص يكون سائل شوي وهذا تتحكمين فيه عن طريقة اضافة الحليب المكثف المحلى والخفق حتى الوصول للقوام المثالي.


أنا خمر السنابون ^_^ من النوع الي اي نوع معجنات أحب أخمره بعد الحشو والتشكيل والسبب هو الحصول على أروع شكل ممكن لاحظوا بعد التخمير كيف شكلهم حلو.


 



خبز السنابون 

خبزته في فرن سبق تسخينة على حرارة 190 لمدة 10 دقايق . المعجنات عموماً كل ما خبزيتها في فرن حار جدا ولمدة قصيرة راح تكون النتيجة معجنات منتفخة جدا وقمة في الهشاشة وفاتح اللون من الداخل والعكس صحيح لو خبزنه في فرن متوسط الحرارة ولمدة طويلة بتكون معجناتنا مش بدرجة الهشاشة المطلوبة ولا حتى الانتفاخ. وهذا شكل السنابون بعد الخبز.









سنابون مثالي ماشاء الله . تذكرين يوم قلت يفضل نخفق الحشو عسب ما تظهر من السنابون وما تسيح هذي النتيجة ^_^

لاحظي السنابون بروحها اتبطلت من كثر ماهي هشة وترفة ومثل القطن أنصحج تجربينها.






مثل ما قلت الصوص عندي كثيف وبارد والسنابون دافي . حطيت خاشوقة كبيرة من الصوص على وجه السنابون وخليته يذوب ويسيح بحرارة السنابون وهذي النتيجة هذا شكلها من فوق 




وهني من الجنب




وطبعاً نكهة السنابون ما تكمل بدون رشة من صوص شوكلاتة الهيرشي